Pidato Melewakan Datuak

Pidato malewakan panghulu suku malayu koto kaciek Datuak Bandaro Sati

Pasa Kuok, Nagari  IV Koto Hilie , Kamis, 31 Juli 2014

Oleh

Budhi Mulyadi, SKp., M.Kep., Sp.Kep.Kom Dt Bandaro Sati

Sambah sujuik ka panghulu, sabarek bungka

Nan piawai, naraco luruih main daun

Indak basibak jo basisieh, bukan bainggo jo babbateh, dari ujuang lapeh kapangka, dari tapi lalu ka tangah, ka tampek ambo mangantakan sambah

Koko indak taangek tasusun jari tassabuik tabilang tuah, ta atok ta imbau gala

Karilahan sajo mamanuhinyo

Gantang panuah cupak balanjuang

Sukatan anak minang kabau, rila jo maaf

Sambah dianjuanghkan, ukua jo jangko kok talampauan, kalalawa di pulau rimbang, anak ruso mati tadabiah, kok gawa mintak ditimbang, kok doso ampuan balabiah

Sambah kapado niniak mamak, nan gadang basa batuah, nan bapucuak sabana bulek, nan baurek sabana tunggang, nan tinggi tampak jauah, nan gadang jolong basuo, ka pai tampek batanyo, kapulang tampek babarito

Kayu gadang ditangah koto, nan baurek tamopek baselo, batang dapek ka basanda

Dahan tampek bagantuang, daun labek tampek balinduang kapanasan, tampek batadauah kahujanan

Bilo maulano jo tuanku, suluah bendang adat limbago, kok duduak bacamin kitab

Tagaknyo rintang jo pituah, nan tahu halal jo haram, tahu sah jo nan bata, kok suluahnyo maso didunia, bendangnyo sampai ka akhirat, undang undang ka madinah kapayuang panji ka sarugo

Panungkek, Hulubalang , iman katik jo manti pagawai adat

Nan tahu salah jo bana,

Tahu jo rantiang nan ka mancucuak, dahan nan ka mahimpok

Nan mudo pambimbiang dunia, parik paga dalam nagari, nan capek kaki ringan tangan, capek kaki indak panaruang, ringan tangan indak pamacah, aso tarantang duo sudah, pambangkik batang tarandam, nan bahati suci jo muko janiah

Langkok sagalo bundo kanduang limpapeh rumah nan gdang, sumarak di dalam kampuang, hiasan dalam nagari, kok awih bakek mintak aie, kok lapa bakek mintak nasi, iduiknyo tampek manyaso, kok matinyo tampek baniat, ambun puruak aluan bunian

Sairing balam jo barabah

Balam lalu barabah mandi

Samo mambubuang jo tampuo

 Sairing salam jo sambah

Salam lalu sambah kumbali

Talingkuang ka angku-angku kasadonyo

Assalamualaikum warahmatullahi wabarakatuh

          Kasa ambun kasa baludu

Batanti jaik  tapi

Baturap jo banang sirah

Tahampai di sandaran

Minta rila jo maaf ambo kapado panghulu nan hadir

Nan salirik duduak kanan  jo kida

Nan asaedaran mahadok ka tangah

Jo sambah dimuliakan

Alhamdulillah hirabbil alamin n

Wasalatuwasalamualaasrafil ambya wal mursalin

Wa ala alihi wa’ ashabihi ajmain

Ashhadullah ila ha illallah

Wa ashhadunaan muhammad Rasulullah

Allahumma salli ala saidina muhammad

Wa’ala alihi wa ashabihi ajmain

Amma ba’du

Yang terhormat

Bapak Gubernur Prov Sumatera Barat

Bapak Bupati Kabupaten Pesisir Selatan beserta muspida

Bapak Camat Batang Kapas beserta muspika

Bapak Kapolsek Batang Kapas

Ketua KAN IV Koto Hilie beserta pengurus

Wali nagari VI koto Hilie

Parangkek adat suku malayu datauk bandaro sati

Niniak mamak mande bapak bundo kanduang, anak kamanan suku malayu kabasaran Dt Bandaro Sati

Beserta undangan

          Anak itiak diateh dalimo

Anak alang dalam biluka

Ko ketek indak basabuik  namo

Kok gadang indak baimboan gala

Alhamdulillah pado hari kini, kami suku malayu kabasaran datuak bandaro sati dapek maangkek acara malewakan panghulu nan di amanahkan kapado ambo hasil kasapakatan suku malayu datuak bandaro sati.

Bulek aie di pambuluah

Bulek kato jo mupakaek

Kok bulek alah dapek digolongkan

Kok pipih alah dapek dilayangkan

Patah tumbuah hilang baganti

Amanah  nan diagiahkan kapado ambo,

Ambo nan umua baru satampuak jaguang

Mohon ambo kapado angku-angku datuak, pimpinan dari unsur pemerintah, niniak mamak, mandeh bapak, bundo kanduang untuk maingek-ingekan ambo kok ado nan indak sasuai alua jo patuik. Jo lapang dado hati nan barasiah ambo tarimo insyaAllah untuk kamajuan kito basamo

Hadirin nan berbahagia

Untuk diketahui kami suku malayu kabasaran datuak bandaro sati adolah salah satu suku dinagari IV Koto Hilie, sajak nagari ko ado sampai kini, kami bakambang biak sampai karantau urang.  Angku-angku datuak kami sabalunnyo jo niniak mamak, mande bapak dari dulu  kami alah maangkek martabat kampuang kito dengan kebesarannyo. Untuak itu kini amanah ambo adolah manaruihkan untuk maangkek martabat kampuang kito khususnyo suku malayu Datuak bandaro sati. Semoga niek ikhlas ko didukuang kito basamo dan dimudahkan oleh Allah SWT.

Kami berkomitmen untuk ikuik mambangun kampung jo halaman nan kito cinto ko supayo maju bacando nagari urang. Untuk itu kami siap bakarajo samo dengan sagalo unsur nan ado dikampuang kito, baiak dg pemerintah, dan sagalo unsur di masyarakat.

Kapado kaum ambo kasadonyo, niniak mamak, mande bapak, bundo kanduang anak kamanakan suku malayu datuak bandaro sati,Ambo ucapkan tarimo kasih banyak atas kepercayaan kapado ambo diangkek manjadi panghulu di suku malayu datauk bandaro sati. Ambo bajanji sapanuah hati untuk manjalankan amanah ko. Semoga Allah maringankan langkah usaho ambo basamo  niniak mamak, mande bapak, bundo kanduang anak kamanakan mamajukan kaum kito.

niniak mamak, mande bapak, bundo kanduang anak kamanakan suku malayu datuak bandaro sati,

 mari momen hari kiniko kito jadikan momen untuk manyatukan kito basamao, batapatan pulo jo hari rayo, hari kamanangan, hari ba maaf maafan, mari kito lapangkan dado, randahkan hati untuk saling mamaafkan,kok nan salamoko kito basilisiah, namonyo hiduap badampingan indak lupuik dari kasalahan, pado saat kiniko kito diharagoi oleh tamu-tamu kito nan mulia ko. Mari kito tunjukkan raso basamo kito

Ka bukik samo mandaki, ka lurah samo manurun, kok barek samo pikua, ringan samo kito jinjiang.

Mari kito saayun salangkah mambangun kaum kito. Maju ambo, maju kito basamo. 

Kabarhasilan kito adolah manumbuahkan generasi dimaso nan ka datang dari kaum kito nan cadiak, pandai, alim, ulama, nan tahu jo adat jo agamo.

Anak kamanakan kito samo samo kito didik jo agamo jo alimu sahinggo jadi pamimpin nan labiah hebat pulo di kamudian hari.

Anak dipangku kamanakan dijinjiang.

Jaan sampai kito basalisiah jo harato dunia.Harato warisan kito nan batambah lamo samakin bakurang. Kito hiduik di dunia ko samantaro, nan kito kana hiduik nanti di akhirat, nan kekal abadi nan ka kito tarimo.

Mumbang jatuah kalapo jatuah

Mari kito amalkan pituah minang nan mulia

Adat basandi sarak sarak basandi kitabullah

Syarak mangato adat mamakai.

“Kullu nafsin za ikatul maut”

“ yauma yakurumurruhu wal malaikatus saffa, la yatakallamu, illa man azinalahu rahman, wa qala sawwaba”

Satiok nan baangok pasti mati

Hari dimana setiap ruh berkumpul bershaf shaf (padang mahsar), indak ado nan bisa mangecek, kecuali nan dizinkan Allah dengan berkata benar

Katiko kito mayalasaikan suatu  pakaro di kaum kito itu nan kito dahulukan.

InsyaAllah kito akan salamaik hiduik didunia salamaik pulo diakhirat.

Ambo salaku panghulu nan diangkek basamo, insyaAllah akan manjalankan  Adat basandi sarak sarak basandi kitabullah.

Ambo hanyolah sabatang badan punyo keterbatasan dan kalamahan. Tapi, kaalu didukuang basamo-samo insyaAllah keberkahan akan datang dari Allah SWT. Sahinggo Allah manurunkan razaki dari nan  balimpah.

Kapado kaum ambo kasadonyo, niniak mamak, mande bapak, bundo kanduang anak kamanakan suku malayu datuak bandaro sati.

Mari kito bajanji basamo-samo dihadapan tamu-tamu kito kasadonyo ko, jo Allah SWT nan manyaksikan ucapakan jo parbuatan kito. Kito bajanji untuak saling bahu mambahu,

Ka bukik samo mandaki, ka lurah samo manurun, kok barek samo pikua, ringan samo kito jinjiang.

Mari kito saayun salangkah mambangun kaum kito

Acara malewakan ko terselenggara dan sukses indak lapeh dari karano karajo samo dari berbagai pihak, untuk itu pada kesempatan ko ambo mengucapkan tarimo kasih kapado yang terhormat,

         

Bapak Gubernur Prov Sumatera Barat

Bapak Bupati Kabupaten Pesisir Selatan beserta muspida

Bapak Camat Batang Kapas beserta muspika

Bapak Kapolsek Batang Kapas

Ketua KAN IV Koto Hilie beserta pengurus

Wali nagari VI koto Hilie

Parangkek adat suku malayu datauk bandaro sati

Niniak mamak mande bapak bundo kanduang, anak kamanan suku malayu kabasaran Dt Bandaro Sati

Beserta undangan

Anak itiak diateh dalimo

Anak alang dalam biluka

Ko ketek indak basabuik  namo

Kok gadang indak baimboan gala

Adopun acarako indak lapeh dari kakurangan,

Kok ado undangan nan hadir duduak indak ditampeknyo, indak tapanggia namo jo galanyo nan patuik, kok hidangan indak ditampeknyo, kok bumbu kurang garamnyo. Ambo ateh namo suku malayu datuak bandaro sati mamohon maaf kasado nan hadir.

Urang padang mambali banang

Dikumpua mangko dilipek

Dilipek lipek lalu dipatigo

Indak pandai ambo bapidato panjang

Elok dikumpua  naknyo singkek

Singkek diambiak nan paguno

Tambilang dilubuak auo

Tasisiak ditapi pantai

Dibilang sado nan basuo

Nan tingga untuak urang nan pandai

Kok ado jarum nan patah

Jaan disimpan dalam peti

Kalaukan sajo  ka mato papeh

Kok ado pidato nan salah

Jan disimpan dalam hati

Buang sajo ka  lawik lapeh

Mohon maaf ambo kasado nan hadir

Billahi taufik wal hidayah

Assalamu’alaikum warahmatullahi wabarakatuh